बेरोजगारी - Unemployment

😷🚫

सध्याच्या काळातील सर्वात ज्वलंत आणि महत्वाचा विषय .
पण राज्यकारण्यांना याचं काहीच गांभीर्य नाही हे मोठं दुर्दैव आहे .
राज्यकर्त्यांचं सोडा , जी तरुणाई बेरोजगार आहे आणि ह्या ; " भाऊ , दादा , तात्या , शेठ , साहेब , मालक " ह्यांच्या मागेपुढे फिरते त्यांनासुद्धा या " बेरोजगारी " च काहीच गांभीर्य नाही .
( कमवण्याच्या वयामध्ये हेच तरुण कायम अश्या राजकारण्यांच्या मागे पुढे शेपूट हलवत फिरत असताना सर्रास दिसते )
मी नेहमी या टॉपिक वर बोलत / लिहीत असतो .
चौका चौकात ; कुठल्यातरी नेत्याचा फोटो - नाव असलेला टीशर्ट घालून तोंडातील पुड्यांची पिचकारी मारत बसलेले तरुण मी नेहमी पाहतो .
खूप भीषण परिस्थिती आहे हि .
२ वेळेस धाब्यावर हाडकं खायला मिळणे , पाहिजे त्याला सोमरस मिळणे , आणि स्वतःच्या बापाचा रोड असल्यासारखं वाकडंतिकडं होत मोटरसायकल चालवण्यासाठी त्यात भरायला २ - ४ लिटर पेट्रोल मिळणे . यातच हे तरुण धन्यता मानतात .

या तरुणांना हे सुद्धा समजत नाही , कि तुमच्यासारखे भंपक हिरो ह्या नेत्यांना पुष्कळ मिळतात . पण तुमच्या परिवाराला तुम्हीच असता फक्त .
घरात २ वेळेसच्या जेवणाची भ्रांत असते , आई बाप घर चालवण्यासाठी अतोनात काबाडकष्ट करत असतात ; आणि चौकात बसून हा " हिरो " कुठल्यातरी नेत्याच्या तळव्यांची धूळ चाटत असतो .
" दादा - भाऊ - शेठ - मालक " असा गजरच चालवत असतो .
स्वतःच्या आई बापाला २ शब्द नीट बोलणार नाही , ना कुठलं घरातलं काम करणार . पण ह्या नेत्यांच्या बुटाला सुद्धा पॉलिश करून देणार .

आरे आपला बाप सुद्धा ' हाडा - मासाचा ' माणूसच आहे .
एका विशिष्ट वयानंतर त्याच शरीर सुद्धा थकून जातं .
कुठंतरी आपल्या सारख्या तरुणांकडून घराला हातभार लागेल अशी भोळी अपेक्षा ठेवून एक एक दिवस मागे सारला जातो .
ज्या वयात तरुणाईने " रोजगार - काम धंदा - उद्योग - व्यवसाय - नौकरी " यांसारख्या विषयाकडे लक्ष दिले पाहिजे , त्याउलट हीच तरुणाई ह्या नेत्यांच्या वाढदिवसाला बॅनर वर आपला फोटो लावण्यासाठी धडपड करीत असते .
हे अगदी भयावह आणि विदारक चित्र सध्या सगळीकडे दिसत आहे .

उद्याचा विचार करा , तुमच्या डोक्यात विचार पण येणार नाही त्यापेक्षा जास्त वेगाने जग पुढे जातंय .
ह्या जगात टिकण्यासाठी स्वतःला सिद्ध करा . ह्या नेत्यांच्या मागे पुढे गोंडा घोळण्यासाठी तुम्हाला जन्माला घातलंय का , तुमच्या आई बापाने ?
आज सरकारी नौकरी चा ग्राफ , दिवसेंदिवस उतरतच जातोय . साध्या शिपायाच्या ५० जागेसाठी ( माफी असावी , शिपाई ची नौकरी मिळणं पण मुश्किल आहे ) ५०००० फॉर्म्स येतायत . त्यात पदवीधर , पीएचडी होल्डर्स , उच्च पदवीधर , उच्च शिक्षित ...यांचीच संख्या जास्त असते .
मग आपल्याकडे तर फक्त साहेबांच्या बंगल्यावरची चाकरी , बस्स एवढाच अनुभव/पदवी आहे . याचा कुठच उपयोग होत नाही . आणि तुम्ही गेलात तरी बंगल्यावर #दुसरा_डॉबरमॅनयेतोच .

खाजगी कंपन्यांमध्ये अगदी ८ - १० हजारावर गुरासारखं राबताना कित्येक जणांना मी पाहिलंय .
वेळेवरच सर्व तरुणांनी सावध व्हावे . ह्या साहेबांच्या बंगल्यावर हेलपाटे घालण्यापेक्षा रोजगारासाठी धडपड करा . आई बापाच्या कष्टाला हातभार लावा .
एक किस्सा सांगतो ,
" माझ्या ओळखीच्या घरातील काकू एकेदिवशी मला बोलल्या , आमच्या ****** ला नौकरी बघ ना कुठंतरी . दिवसभर हुंदडत फिरत असतो त्या ***** च्या मागे . २९ वर्ष वय आहे याच आता , लग्नाला आलाय . ह्याच्या बापाला मोलमजुरी करून दिवसाला २०० - ३०० रु. आणि मला धुनी भांडी करून महिन्याचे ३००० - ४००० रु. मिळतात .
मी त्या ****** ला बोललो , अरे त्या भाऊंचा उदो उदो करण्यापेक्षा काम धंद्याचं बघ . तर खट्याळ हसून , तुम्हालाच काही अडत असेल तर सांगा ; भाऊंकडे शब्द टाकतो असं बोलून मला निरुत्तर केलं त्याने .
काय समजायचं ते मी समजलो , आणि विषय सोडून दिला . पण बरोबर ३ महिन्याने तोच ****** माझ्याकडे आला आणि रडायला लागला . बोलला , तुमच्या कंपनीमध्ये किंवा ओळखींमध्ये काम / नौकरी बघा ना माझ्यासाठी . त्या ****** ने म्हणे त्यांचं एक काम नाही केलं तर कुत्र्यासारखा चोपला याला आणि अगदी घालून पाडून बोलला " ......

असो , अस नको व्हायला . लवकर सावध व्हा .
#बेरोजगार_भत्ता मिळण्याची वाट बघत बसू नका .
स्वाभिमानाने काम करा .
नाहीतर , उद्याचा येणार भयानक दिवस तुम्हाला गिळंकृत करायला टपून बसलेलाच आहे .

आपल्या भारत देशातील तरुणाईचा डेटा खालीप्रमाणे आहे -

" India has more than 50% of its population below the age of 25.
More than 65% below the age of 35.
It is expected that, in 2020, the averageage of an Indian will be 29 years ."

( भारतात संपूर्ण लोकसंख्येच्या जवळपास ५० % हे २५ वर्ष वयोगटातील आहेत . ६५% पेक्षा जास्त लोकसंख्या हि ३५ वर्ष वयोगटातील किंवा त्यापेक्षा कमी गटातील आहे . २०२० मध्ये भारतातील लोकसंख्येचं सरासरी वयोमान हे २९ वर्ष असण्याची दाट शक्यता आहे )

म्हणजे आपण जेवढ्या लवकरात लवकर कमवायला लागू किंवा रोजगार करू लागू , तेव्हड आपलं भविष्य आपण सक्षम करू .

तरुणाईने ह्या असल्या नेतेमंडळींच्या मागे पुढे न फिरता आपल्या स्वतःच्या व आपल्या परिवाराच्या भविष्याविषयी चिंतीत व्हावे . त्यावर लक्ष द्यावे .

आज ग्रामीण भागात ३० - ३५ वर्षातील कित्येक तरुण अविवाहित आहेत . रोजगारच नाही , कमाईचा मार्गच नाही . मग लग्न तरी कस होईल . ह्या वाढत्या बेरोजगारीमुळे समाजात वाईट प्रवृत्तींना उधाण आलंय . गुन्हेगारी वाढतेय . पर्यायाने ह्या राज्यकारण्यांचा हेतू साध्य होतोय . आपला नाही 😡

__/\__

 

rups.515@gmail.com